राष्ट्रवादी नेत्याचा निर्घृण खून; पाच तुकडे करून मृतदेह नदीत फेकला......!

रांगोळी – राष्ट्रवादी काँग्रेसच्या कोल्हापूर जिल्ह्यातील रिंगोळी ग्रामपंचायतीचे सदस्य आणि पक्षाचे स्थानिक कार्यकर्ते लखन आण्णाप्पा बेनाडे (वय ३२, रा. रिंगोळी, हातकणंगले) यांचा अपहरण करून निर्घृण खून करण्यात आला. आरोपींनी त्यांचे हात, पाय आणि शिर वेगवेगळे करून मृतदेहाचे पाच तुकडे केले. हे तुकडे पोटात भरून कर्नाटकमधील संकेश्वर परिसरातील हिरण्यकेशी नदीत फेकण्यात आले.

ही घटना उघडकीस आल्यानंतर परिसरात खळबळ उडाली आहे. पोलिसांनी या प्रकरणी लक्ष्मी बेनाडे-घस्ते (वय ३६, रा. राजेंद्रनगर) आणि तिचा पती विशाल घस्ते यांच्यासह पाच संशयितांना अटक केली असून, त्यांनी गुन्ह्याची कबुली दिली आहे.

दोन वर्षांपूर्वीपासून सुरू झालेली दुश्मनी
विशाल घस्ते दोन वर्षांपूर्वी पोलिस कारवाईमुळे कारागृहात होता. त्याच्या पत्नीसाठी कर्ज मिळवण्याच्या प्रयत्नात ती लखनशी संपर्कात आली होती. मात्र, नंतर लखनने तिच्यासोबत जबरदस्तीने राहायला सुरुवात केली. नातं बळजबरीचं असल्याने त्यात कलह निर्माण झाला.

विशाल घस्ते जेलमधून सुटल्यानंतर लक्ष्मी पुन्हा लखनकडे परतली. तेव्हा विशालला राग आला आणि त्याने लक्ष्मीला मानसिक व शारीरिक त्रास द्यायला सुरुवात केली. त्यामुळे लक्ष्मी आणि तिच्या सहकाऱ्यांनी लखनच्या विरोधात अपहरण, धमकी आणि मारहाणीच्या तक्रारी विविध पोलिस ठाण्यांत दाखल केल्या होत्या.

राजकीय रागातून खूनाचा कट
लखनने शाहूपुरी, कोडोली, मिरज, सातारा, इचलकरंजी आदी ठिकाणी लक्ष्मी घस्ते विरोधात तक्रारी दाखल केल्या होत्या. त्यातून राजकीय राग निर्माण झाला. त्यातच तीन लाख रुपये व दागिन्यांबाबत झालेला आर्थिक वादही होताच. हे सगळं लक्षात घेऊन संशयितांनी लखनचे अपहरण करण्याचा कट रचला.

१० जुलै रोजी लखन शाहूपुरी पोलिस ठाण्यात तक्रार देऊन बाहेर पडत असताना विशाल घस्ते आणि त्याच्या साथीदारांनी त्याचे अपहरण केले आणि मोटारीत ठार मारले. त्यानंतर संकेश्वर येथे त्याचे पाच तुकडे करून, पोटात भरून नदीत फेकले.

अनेक गुन्हेगारी पार्श्वभूमी असलेले आरोपी
या प्रकरणातील प्रमुख आरोपी विशाल घस्ते याच्यावर चोरी, मारामारी, बलात्कारासारख्या गंभीर गुन्ह्यांसह २० हून अधिक गुन्हे दाखल आहेत. तो पूर्वीही कारागृहात होता. दुसरा आरोपी आकाश उर्फ माया घस्ते, कुमार गायकरवाड याच्या खुनातील संशयित आरोपी होता.

अटक केलेले आरोपी
या प्रकरणी अटक करण्यात आलेले आरोपी असे आहेत :

लक्ष्मी बेनाडे-घस्ते (३६, रा. राजेंद्रनगर)

विशाल बाबुराव घस्ते

आकाश उर्फ माया दीपक घस्ते (२९, तामगाव, करवीर)

संस्कार महादेव सावर्डे (२०, देवळे, करवीर)

अजित उदय चुटेकर (२९, जुना वाशी नाका परिसर)

पोलिसांनी मृतदेहाच्या तुकड्यांचा शोध घेण्यासाठी शोधमोहीम सुरू केली आहे. आरोपींकडून मिळालेल्या कबुलीनंतर तपास अधिक वेगाने पुढे जात आहे. स्थानिक गुन्हे शाखा, विविध पोलिस अधिकारी आणि यंत्रणांनी मिळून मोठ्या कौशल्याने या प्रकरणाचा उलगडा केला आहे.